Донација од 800.000 евра за црквата во Старо Нагоричане

Донација од 800.000 евра за црквата во Старо Нагоричане

Куманово - Советот на Европа преку Комисијата за развој деновиве и' додели 836.000 евра донаторски средства на локалната самоуправа во Старо Нагоричане за санација на објектите на познатата црква „Свети Ѓорѓи“. Средствата ќе се дистрибуираат преку Министерството за култура, а ќе бидат вложени во зафати за поправка на фасадата и покривот на храмот „Св. Ѓорѓи“, како и останатите објекти во црковниот комплекс.

Ова е прва поголема меѓународна донација за овој светски познат средновековен културно-историски споменик, за кој во минатото државата издвојуваше одредени средства, но никогаш доволно за целосно да се заштитат објектите од пропаѓање, велат во локалната самоуправа на Општина Старо Нагоричане.

Со завршување на проектот за конзерваторско-реставрирачки зафати на фрескозаписите и сакралните предмети, како и санацијата на црковното предворје, црквата ќе им го отвори сиот раскош на овој византиски споменик од 14 век на посетители од цел свет. (Ст.Б.)